新春隨筆

不經不覚2010年已過去了一個多月， 而虎年又開始了。

去年10月的意大利遊沒有甚麽特別經歷， 旅途中也沒有認真想過某些事，只是隨意的玩了两個多星期，不過回來之後真的覚得從心內輕鬆了，應該要放下的又放下很多了，或者只可以說時間可以解决問題。思想只可以隨心，但理智可以控制情緖和行爲，或許只需把它藏於心底某個角落，只要不執着於何時放下，那又有甚麽煩惱會很困擾我們呢！

從來不期望長壽，那麽我的人生路差不多已走過一大半，不要想得太多了，只想活得健康和開心。意大利回來之後的數個月，上班時仍然堅持做好本份外，下班後及公餘時間裡就只是争取做瑜珈、游水、和朋友及家人相聚，想想如何吃三餐及其他瑣碎事情，生活得簡單而思緒平静。

此外還有幾個虎年願望：要完成意大利遊的網綕啦；要減重至５２公斤，大約減５公斤啦；要再上一次神山，期望這次可以克服高山反應而順利登頂啦。

當然還有一些夢想，當可以實現時才說吧。

Hea 在意大利(1) - 組合

有朋友撩起去意大利，仲話要自駕遊， 幾吸引喎， 夾吓啲時間， 得喎， 去馬啦！
要揾脚呀，擾擾攘攘咁， 一個四人組合終於誕生喇！

E君：靈魂人物，意大利遊的發起人； 領隊, 適時作出最後决定；主車手， 差不多負責全程的駕駛任務；全團的唯一男士, 粗重功夫既主力, 不過三個女士都唔會袖手旁觀架；佢應該係全團最辛苦嗰個。



R君：暫時跛跛地；主車手助理，負責查地圖；第二車手，負責小部份的駕駛任務；隨團攝影師，拥有超 Wide 镜頭10-22，好勤力咁硏究影相嗰個。








L君：負責行程路綫；及時報告旅遊資料；非常落力於尋找投宿處；負責車內打碟以防車手眼瞓；隨團 Model。



V君：揸數既，保管住啲公款；帶咗國際車牌，不過無諗住揸車既第三車手；適時俾吓意見咁囉，因爲輩份高；係車入面瞓得最多嗰個， 可能係全團最 Hea 既團友；都恊助吓揾投宿處咁囉。

失眠(2)

躺在床上差不多两小時喇，還是睡不着。從意大利回來五天了，只是六小時的時差，但仍然未恢復正常的作息時間。失眠但不敢做那些要認真動脑筋的事情，怕越思考脑袋越興奮更難以入睡，只好寫無聊的網綕消磨這清醒的時間。

之前的早上睡到十一點多，午飯後又任性地飲了杯咖啡，失眠似乎是自找的，該死死死死......！

剛飲了些甜的紅酒，希望可以幇助入睡啦！但願可以睡三小時才上班吧，天快亮了......。

Hea 完了，意大利！

好像才剛剛出發，但足足16日的意大利之旅已經完結，昨天零晨回到澳門了。

置身於人頭湧湧的明勝古蹟，看過富麗煻煌的教堂和目不睱給的精細雕塑，遊走及住宿於寧靜小鎮，品嚐了名不虚傳的碳烤薄餅、彿羅倫斯牛扒、及牛肝菌配搭的菜式，到處都可盡享如意料中美味的雪糕、咖啡、火腿，隨意都可盡飲便宜又滿意的意大利酒，唔......不錯的意大利之旅！！

舌頭肿痛熱氣喎！旅程的尾聲還是掛念着雲吞麵、豉油皇炒麵、蒸魚、青菜、白飯、老火湯......，我是正牌廣東人呀！

今天上班喇，因時差而昨晚睡得不好，不過工作狀態不錯喔！繼續繼續繼續！！！

在意大利 Hea 完囉，跟住要落足心機整理相薄及寫意大利遊的網綕，不過我的進度應該很慢喔！盡力啦！

我來了， 意大利！

期待的意大利之旅今晚出發喇！

今次係只有四個人既自由行，仲係自駕遊添！諗吓鍾意邊度架車就停響邊度，諗吓昅倒邊間鍾意既B&B 或者小旅館就入去睇吓，幸運既又可以住係嗰度，又可以同啲小鎮既當地人打吓交道，諗吓啲美味既意大利雪糕、咖啡、芝士、火腿、意大利粉......，諗吓享受住歐陸情調嘆住意大利酒......嘩，真係好開心呀！！！

帶咗四個小月餅呀，八月十五既意大利月亮係咪都係圓既呢......

八號風球喇

今日傍晚七點掛咗八號風球喇！放工番到屋企就隔住露台玻璃門影咗幾幅相，唔......效果都唔錯，啲相唔似隔住玻璃影嗰喎！

我幾鍾意打風架！隔住玻璃門望住出面横風横雨，聴住呼呼既嚇人風聲，而我係屋入面係安全嗰喎！然後帶住啲好似放假既心情，整吓嘢食，睇吓電視，睇吓DVD，又或者寫吓Blog啦，真係好享受喱種感覚呀！其實平時放工都有做喱啲嘢嗰喎，不過總係缺少咗聴日可能唔駛番工既輕鬆心情。我都係無咩大志既人嚟架喇。

記得幾年前既一次八號風球，差唔多廿個既潛水朋友嚟咗我屋企打邊爐。好在佢地係度咋，嗰次打風由露台入水搞到我屋企水浸呀，佢地就七咀八舌落手落脚咁幇我抗洪，佢地幇我幇得好開心咁喎！一班人又冒住風雨出去睇浪呀行街呀，我地年紀都唔細囉，仲做埋啲咁既嘢！係我屋企就打咗两餐邊爐，又睇潛水同滑雪既DVD啦，嘩，我地喱班年紀由拾幾到伍拾幾既傻人就係八號風球高掛下玩咗一日喇，幾開心呀！打風真係唔駛愁嗰喎。

咁聴朝駛唔駛番工呢......

大井巷、白鴿巢、蓮溪廟

昨天想影相就去了小時候居住的新橋區閑逿。嘩！青草街大井巷5號還在，那是從我有記憶至初中時居住的房子。那厨房的窗門現已熔熔爛爛，還記得那時候晚上洗澡時在這窗門的洞上看見一隻眼睛呢！家姐說現在發夢都見到那隻眼睛呀。這條大井巷真短小，小時候生活在這小巷裡可不覺得啊！街口的那口井還在，不過井口已修整了。

到了白鴿巢公園，那是小時候與兄弟姊妹們啦、或與隔離隣舍的一群小嘩鬼經常跑去的地方，還記得有些嘩鬼會向公園外的鋅鐵屋頂拋石頭喇。現在就看見有些中老年人在那裡夾Band唱粵曲，這可是他們較便宜的娛樂啊！

走進了蓮溪廟，原來裡面有許多金色的小神像及彩色女神像，應該找時間看看有關這古廟的資料啊。