享受潚灑與浪漫

有朋友將去埃及旅遊和潛水，十六天的行程安排得密密麻麻。其中包括遊覧很多及偏遠既古迹、紅海既船潛及駱駝潛、沙漠既駱駝之旅、紅海邊既露營、夜行西奈山.......等等。好似唔駛正正經經訓覺咁，好似埃及之旅只係此生一次咁。我去過埃及三次啦，佢地有D行程我都未去過呀！好啦，希望佢地玩得開心D！

好回味六年前與三個朋友既埃及之旅。大家都年紀不少啦，只係買咗來回機票，其中一個朋友好細心咁準備有關埃及既歷史、古迹、旅遊等資料，我就買咗本Lonely Planet - Egyt，四條友四個背囊在年廿九就出發去咗19天既埃及之旅。旅途中討論詳細既行程、找旅舘、找車站、坐十四小時長途巴士由樂蜀去西奈、與樂天又有點狡猾及貪錢既埃及人溝通、但又遇過老實既的士司機。在開羅遇上熱情既韓國餐廳老板娘，為了趕搭飛機，提前開門為我們奉上滋味既酸辣湯麵。在尼羅河郵輪上認識在埃及做生意既中國人，在他們家中作客享受美味既中國餐，又載我們在開羅遊車河。沒有周密計劃既背囊之旅，有D辛苦，但只要随遇而安，真係充滿刺激和意外驚喜架！

亦記得在埃及一些浪漫時光。在西奈Dahab既某一晚，我們三個女性朋友跟住旅行社既老板兼導遊坐車夜探西奈山谷。在圓月既星空下，黑麻麻寂靜既山谷中，四個人躺在平坦既石頭上望着夜空閒聊。聽着埃及導遊深情地訴說他與異國情人無完美結局既現代愛情故事，我地既朋友就用英文講述嫦娥奔月既中國古老愛情傳說。大家年紀都唔細啦，仲有D咁既浪漫情懷！不過咁幾好吖！其實呢次己經係第二次夜探山谷啦！係埃及導遊主動减價說服我地再嚟架。睇嚟係呢個感性既導遊想我地陪佢去浪漫呀！諗翻都有D危險喎！不過呢D咁既浪漫氣氛，要配合天時地理人和，係旅行時才可以感受到呀！

我的病人 - 無奈但滿足

今天上午還是超時才能完成門診。在門診中好似感受咗病人各種既人生體驗，感到有D緊張、有D壓力、感到人生既無奈，不過亦感到有D感動和滿足。做嘢啫，乜感覺咁複雜！

一個約七十幾歲都好精神既阿婆，無咩病不過睇咗我十幾年。每次都係嚟同我傾幾句，攞D維他命或開胃藥。佢會話："醫生好在你睇我 Ja，你真係好呀。下次咁耐先覆診既！" 我試過同佢講："你無病，唔駛覆診啦。" 不過佢唔意。在門診中我唔夠時間同佢傾多D。佢可能係獨居老人，嚟衛生中心可能想見多D人，係侯診室可以同其他人溝通吓，見醫生又可以傾訴吓。其實定期見醫生、量吓血壓、幾年驗一次血，可以早期診斷高血壓、糖尿病或者其他疾病，咁都係好既。

一個50歲既女病人，可能睇我都有10年啦。嚟睇頭暈、地中海貧血。為咗了解佢是否有家庭或情緒問題，於是問佢多D嘢。講講吓就好自然咁講咗佢既故事。佢19歲時由阿媽介紹認識當時係中國大陸既老公。佢阿媽話："佢係老咗D，大你18歲，不過佢係好男人嚟架。" 佢初時都唔鬼睬呢個男人，就算結緍初期都對佢無咩感覺。日子過吓過吓咁佢就鍾意咗呢個老公。於两地分隔時期，相聚後要離開時仲互相依依不捨添。個病人話："感情真係可以培養架！我老公對我好好呀！我有病又識得安慰我。" 有D感動呀！羨慕佢擁有一段細水長流既感情。三十年啦，仍然甘之如飴。睇嚟佢都無咩家庭問題。

一個85歲很瘦既婆婆，佢無咩血壓高、糖尿病、或者心臟病。佢次次嚟都係話："我周身好痛，郁少少都好辛苦呀！我幾時先可以死，唔駛辛苦呀！" 我唔知點答佢。對於咁老化既身驅，藥物又帮到佢幾多呢。由於無耐性等，佢個仔剛才係候診室嘈隆隆，之前又衝過入診室嘈，好躁呀！佢個仔都可能有好多既生活壓力。估計阿婆在家中都得唔到D咩既温暖。好無奈呀！

一個約40歲初診既女病人，幾年前睇過我。佢話有好多問題，頭唔舒服、睡不好、神經緊張呀.......等等。佢好想係第一次門診講曬所有問題。在十幾ニ十分鐘既時間內，我要令佢明白我唔可以係一次門診聽曬同解决曬佢所有既問題、要控制佢無條理既說話、寫我有條理既病歷、問佢我需要既疾病資料、做有需要既身體檢查、申請有關既化驗、開藥、約覆診，仲有候診室有幾個等咗個幾两個小時既病人，好大壓力呀！

做一個好既全科醫生好難呀！未必能解决病人既問題，好無奈啊！但仍能得到病人既信任，繼續維持良好而長久既關係，都有滿足感架！

我的病人 - 不想太認真

最近有點情緒低落。前天及昨天既周末都留在家中發霉。今天又要返工啦。

今天上午做門診時突然唔想太認真，於是襯住病人因接受檢查而情緒緊張就撩佢講嘢。"今日想食咩嘢呀？" "想煲湯。" 煲咩湯呀？" "豬肚、花膠、瘦肉、淮山、茨實湯。可以醫胃病架！D人話飲呢個湯唔駛食胃藥呀！" "係呀，係呀，應該幾好飲喎，揾日試吓先。" 病人無咁緊張咁就做完個檢查，大家又好開心咁分享咗一D嘢。不過個病人唔係嚟睇胃病既。

好，又睇第二個病人啦。講得咁開心，又襯住病人做檢查要分散佢注意力，就問佢："有無做嘢呀？" "無做嘢呀。買吓股票囉，聽D八婆話實賺到D架。去年賺咗十幾萬呀！有時一日又賺幾千蚊。" "有無仔女呀？" "唔駛理佢地囉，一個女22歲，一個女24歲。" "老公呢，唔駛理呀？" "Hei！D男人呀，唔知呀，費事裡呀。我傻吓傻吓咁，想食セ嘢就食乜嘢，遲D又去旅行啦。" "係囉，要扮蠢呀。" "係呀，係呀，傻傻地咪好囉。" 唔好話佢傻呀，佢可能唔識咩叫 EQ，但佢 EQ 好高。佢好聰明呀，識得扮唔知，最緊要自己開心，又識得好潚灑咁享受生活。

睇完上午既門診，個人好似輕鬆咗D。我地可以醫治病人，但有時從病人身上可以獲得心理輔導架。只要抱着客觀開放既態度，從每個人身上都可以獲得一些啟發或領悟。

工作馬拉松

為了報讀工作上的進修課程，最近終於填完長長的報名表格。如果能夠通過評估考試，大約两個月之後課程就開始啦。

回顧過去，入讀大學、開始工作、在職培訓、升職、最近一年的工作變動，這些都不是自己拚命努力争取而獲得的結果。只是順其自然獲得的機會，但憑著責任心、意志力、盡本份努力地工作走我過去的人生。

如果把工作生涯比喻為馬拉松，自己過去廿多年憑著體育精神、不祈求名次、盡責地慢慢堅持這個長跑。現在最後一段啦，目前的工作及報讀進修課程好似要我發力加速咁。我害怕不夠能量無力加速呀！尾段的馬拉松可不可以慢慢跑呀？