探親之旅(1)

嚟緊既9月21日至10月20日就會身處美國探望大佬同家姐喇。

最近同家姐通咗唔少電郵講關於去洛杉磯探佢既事，不過今日下午就第一次電郵係紐約既大佬，問候吓佢啦、問吓有咩要帶俾佢、又問吓十月初紐約既天氣囉。好快咁今晚佢就覆咗我既電郵喇。

電郵中大佬話：
"I haven't seen you almost for ten years. You are very very welcome to come to New York and to see me!! I need nothings but just want to see you."
睇到喱幾句說話，好感動，好想喊呀！家姐移民咗美國十幾年，而大佬都移民咗十年喇！

我地在非一般既家庭長大，感受住非一般既家庭氣氛，兄弟姊妹間溝通唔多。大佬大我十幾年，佢應該好年輕既時候就搬咗出去住，記憶中我無同喱個大佬住過同一間屋。我地缺少咗親密既兄弟姊妹關係，好多嘢都講唔出口，突然間睇到啲咁感性既話語，啲複雜感覚就湧出嚟喇。

越南行(3)

今次係胡志明遊盪咗三日，同十三年前比較當然係商業化咗好多啦。多咗好多五星六星級酒店；除咗街邊檔牛肉河，又有整潔企理既河粉專賣店，好似叫"Pho 2000"既河粉店啦；最能表現越南風情既純白貼身傳統服，依家變咗五顏六色、低檔高檔既制服啦；仍然係咁多電單車，不過就多咗好多穿着性感、身材豐滿既女騎士啦......。

係胡志明市望吓啲景點，認真咁參觀咗戰争遺迹慱物舘，求其咁揀咗個湄公河一日遊，下午三四點好熱唔想行就翻酒店瞓一陣 , 好容易就 Hea 咗三日喇。

大勒係一千多米高原上既渡假勝地，欣賞自然景色囉。欣賞吓美麗既蘭花，踩吓二人單車，黃昏係湖邊散吓步 , 非常舒服既天氣喔！當然亦都係比十三年前商業化咗囉。不過意外咁見到啲講廣東話既華人呀，佢地擺賣牛肝小食 ; 又見到担着随處擺賣既豆腐花 , 踩完單車食翻碗先。最印象深刻既係接近黃昏時候 , 就見到好多人一家大小咁係湖邊放風箏，佢地有穿着高跟鞋既斯文女仔啦、手抱BB啦、步伐緩慢既老人啦，好與世無爭呀！

越南之旅玩完喇。幻想中既越南風情就無咩囉，不過可以 Relax 咗幾日喎！

越南行(2)

沒有很多的期望，只因很想放幾天的假期、有一個朋友作伴、一個很方便由澳門起飛的旅行地點，如此两個月前去了越南渡假七天。其實都唔係話去就去既地方，要提早簽証，簽証費400大元呀！ 十多年前第一次去越南，而今次再去，越南係點既呢？

沒有很多的凖備，上 Viva Macau 網站買<澳門-胡志明>來回機票，揾旅行社搞簽証，上網訂咗两晚酒店，買咗啲美金，出發前一天急急咁買本越南旅遊指南既書。無計劃行程架，去到先算囉。

好，出發喇！係飛機上我地睇吓本旅遊書、傾吓啲行程、恰吓眼瞓，大約三個鐘就降落到胡志明機場喇。咪走住，換錢先，換三百蚊美金就有差唔多五百萬越南盾咯喎。嘩，两個人帶住成千萬去玩，好豪呀！坐的士去到間酒店，點知櫃檯話查唔到我地係網上 Agent 訂房既資料喎，有房，不過就 Walk In 價囉！Hei，條氣唔順呀，不過好肚餓，無心機係附近揾其他酒店。好，住一晚落脚先，食飽午餐後揾個間好過佢平過佢既酒店！

原來酒店呀、餐廳呀、的士呀，都可以洗美金同越南盾架，而美金價係以黑市價換算嗰喎！咁洗美金化算好多喎，其實只係需要換少少越南盾就得架喇！用嚟食牛肉河呀、買飲品囉。其他既洗費就美金、美金、美金啦！

呢七日點樣 Hea 好呢？咁係胡志明呢度去吓嗰度去吓玩佢三日，再去一個地方玩多三日，呢個越南行就玩完咯喎。而搞搞吓先知，目前越南既陸上交通都係唔發逹，無高速公路、啲火車又慢，去百幾二百公里遠既地方都要坐成日車。咁去遠到北部既河內、中部既會安、近少少既大勒，都係要搭內陸機架喇。去邊個地方都係要差唔多一樣既交通時間。我數過，細細既越南就有15個機場呀！磨吓磨吓咁，就揀咗個包两晚酒店同內陸機既 大勒三日Package 囉。

好喇，係胡志明揀嗰間可以順翻條氣既酒店，又大約定咗個行程，可以安安樂樂 Hea 喇。

越南行(1)

今天的越南 - 胡志明

今天的越南 - 大勒

十三年前與一班學曬相的朋友第一次在越南遊歷了二十天，由北部的河內至南部的胡志明，差不多踩遍了整個越南。

印象中十幾年前的越南幾中國化同共產主義架，尤其河內。當時農歷新年出發，第一站係河內，慘喇，揾唔到嘢食！周圍食嘢既地方都閂門造節過年，原來佢地同我地一樣有農歷年。仲記得街道上見到無任何圖案既紅底白字標語牌，不過標語牌寫咩就唔記得喇，感覚好似文革時期既中國大陸囉！

嗰陣時既胡志明市都好落後架，街道上行走着嘈隆隆既電單車。好多細細間簡樸既 Coffee Shop 擺放着書籍雜誌，啲鬼佬鬼婆就坐好耐咁嘆咖啡睇書，感覚上係啲遊客有少少錢就可以長期 Hea既樂土。又有好多細細間有人係度劃行貨油畫既舖頭。我地就係街邊嘆加咗一羮羮味精既鮮牛肉河粉同越南特式既滴滴咖啡。有時就見到瘦削的少女，穿着白色薄如輕紗貼身的越南傳統服，騎着單車，唔....感覚到啲越南風情喎！

仲記得啲橫街窄巷好有六七十年代澳門 Feel 喎，不過啲細節唔知點去形容，唔知點解我地一班人仲入咗去一個屋企坐！去過啲海灘，不過無咩特別。又記得買咗好多有手綉越南農村風味圖案既 T Shirt 囉。

我的病人 - 失戀呀

前两天一個25嵗女病人來覆診跟進化驗結果同有關既健康問題。

我睇緊其他病人既時候，佢就推開診室門問我："我唔知咁樣掛咗號未呀？見到顯示屏我既號數係黃色。"我就話："你已經攞咗掛號紙仔，電腦又顯示你 Check In 咗囉喎，你等陣喇。"佢好似好緊張咁担心睇唔到醫生喎！

好喇，到佢啦。解釋咗化驗結果同有關既健康問題，又約咗下次覆診，佢仲未想走喎！

然後佢認唔住咁同我講："我同男朋友分咗手喇。"又講咗令人難以接受既男朋友分手理由。
"你係咪好唔開心呀？"
"失眠咗一晚囉。我做翻運動身型結實咗。啱啱係貴州探完亞婆，貴州啲天氣好好呀。"佢又問咗一啲其他既健康問題，又話要扮靚啲。
"你咁靚女，下次覆診既時候，你可能已經有咗新男朋友喇！"
唔係擦鞋喎，佢真係好靚女、夠高、有標準身材嗰喎！
"我好鍾意佢架，佢對我好好，個人又好，我亞媽都好鍾意佢呀。佢個樣同身型又好，我好鍾意呀！"
真得幾可愛喔，有青春真係好喇！

之前既門診佢已經講過有關佢同男朋友既問題，今次佢就講個答案俾我知。作爲全科醫生面對如此個案，我要避免給予主觀既建議。只需要適當回應，聆聽、給予支持、得到病人既信任己經足夠啦。

其實嗰日我由上午九點睇門診睇到約十二點半，然後用二十分鐘食咗個午餐。之後就開始睇中午既七個體檢者和覆診病人，佢係七個之中既一個，而我要係两點半鐘交個診室俾其他醫生做下午既門診。當我睇到呢個病人既時候，都有啲累同精神緊張。不過當佢纒住我同我講佢既心事既時候，我嗰啲咩壓力呀、咩緊張呀，好似驅散咗咁。

我睇呢個病人用咗約三十分鐘呀，不過佢既信任俾咗我满足感而減壓囉。睇嚟病人既信任俾咗我唔少既工作動力喎！

"Once"與"Falling Slowly"

很喜歡看電影，亦很享受在戲院裡專心投入地欣賞電影，而電影院有非常好的音響效果。

很久沒去電影院了，數天前在大會堂看了九點半的"Once"(一奏傾情)，低成本制作的愛爾蘭電影。簡單的故事，在街頭賣唱的男主角與賣花的女主角同樣醉心創作歌曲，他們相遇、相識、相知、互相勉勵、互相幇助彼此實現夢想。結局不完美，亦不太傷感。

電影裡有很多悦耳的樂曲和歌曲，男女主角主唱了所有歌曲，真係好好聴呀！！！電影主題歌"Falling slowly"尤其悦耳動聴呀！嘩，用假聲唱既尾音超超超正呀.....！！！！！！
http://www.youtube.com/watch?v=CoSL_qayMCc&feature=related
http://ts.hjenglish.com/music/26679/?page=1

有人說：How often do you find the right person？

<<負16-無眠-簡意>>

今晚看了藝術節節目：現代舞<<負16-無眠-簡意>>，荷蘭舞蹈劇場二團的表演，一個世界著名的當代舞團。
http://www.icm.gov.mo/Fam/fam_videoC.asp

前天一個好朋友相約，昨天才買票，帶着輕鬆隨意的心情，却驚喜地欣賞了一場精彩的現代舞。十六個十七至二十二歳的舞蹈員，有着不同國籍，意大利、葡萄牙、法國、韓國、中國大陸等等。全都有專業的芭蕾舞訓練，嘩！非常優美的現代舞姿呀！

好喜歡第三個作品<負16>，十六個舞蹈員全都参與的表演，其中一段的編排很特別。每個舞蹈員有一小段獨舞伴隨着非常個人化的自我獨白，記得某些獨白大概如下：

"我媽媽來自葡國，我爸爸係挪威人，我外祖父係西班牙人，我祖父係俄羅斯人，我生於意大利。"
"我男朋友和我同一公司，我們買了一所房子，他喜歡煮食，喜歡煮黃色湯。"
"我女朋友和我同一公司，我們買了一所房子，我喜歡煮黃色湯，煮湯時喜歡爆香洋葱。"
"我喜歡飲酒，我爸爸係一個酒鬼，表演前我喜愛飲酒.....。"

非常自然輕鬆的自我表達，好可愛囉！很久沒看表演了，好享受呀！

救災

今天是四川大地震第九天了，災難發生後一直天陰陰，沒有見過多少陽光，這兩天還下起雨來，似乎上天要爲死難者哭泣。

救人仍在艱辛緊急地進行，還有要對抗餘震，預防洪水暴發及疫症等等.....。遠離災區的我們，只是守候着電視新聞、捐錢。對於目前的救災工作我們有心無力，亦只能繼續着沉重的心情。

捐錢不難，但幫助倖存的人好好生活是長期的工作。對於安置災民、災區善後、加強預防災難意識的工作、開展收養助養計劃、建立照顧孤兒的護幼院等等.......，我們可以保持着熱誠長期地盡一分力嗎？

失眠(1)

很少失眠，不過現在三點多也睡不着。可能因爲日間飲多了茶和咖啡，又或者因爲十一點至一點多時在梳化睡着了，醒後就難以入睡。

很無聊就瞄瞄別人的網誌，看到這样的說話：
"一個人給別人最 珍貴的禮物是甚麽？時間。" "珍惜一個願意花時間在你身上的人。"
很有意思的說話，亦很認同。

閒蕩新橋區

用手提電話影既相

前天與两個朋友在新橋區附近的素食店晚膳後，因爲食得好飽想行吓，三個女人就在新橋區遊遊蕩蕩。

十點幾喇，見到幾十年如一日在街邊賣桑寄生蛋茶既阿伯。見佢慢慢咁搞緊啲鷄蛋，而桑寄生茶就係度煲緊，要十一點幾先有桑寄生蛋茶賣呀！ "好想食阿伯既桑寄生茶喎！" "你阿媽住係附近，我地依家探你阿媽，然後返嚟食糖水囉。" 好吖，我地就去探伯母喇！

大約十一點二十分返嚟咯喎，嘩，有差唔多十個人排緊隊喇！阿伯仲係慢條斯理咁搞緊啲蛋茶，由得你地等囉！我地三條友就係擋口對面既大廈門口等，差唔多十一點四十分先有得食呀！我好似無咩試過坐係街邊地下食嘢喎！咁様食法啲桑寄生茶真係香好多，啲蛋又香滑啲喎！

哈哈，好享受如此的偶然閒情囉！！

情緒低落呀！

好悶呀！咩都唔想做囉！嗰心好重，好似無咩期望咁。

五月尾至六月尾既一個月假期唔想計劃！五月中旬既考試仲未想睇書！我鍾意食野架又唔想諗食乜！理財既野又唔想理！點算呀？真係好鬱悶喎！不過睇病人既時候又幾心情平静喎，無發咩掹憎，好似幾有耐性咁，最近既工作效率仲高咗啲添！諗唔到啲咩特別原因引起咁難搞既心情，唉！！

萬一考試唔合格，訂唔到機票去旅行，咁好大剂喎！！唔得啦，一定要提高啲情緖！好，今晚早啲瞓，明早做吓運動，唔知得唔得呢？

番禺-南沙自駕遊

上星期清明節與三個朋友又去了两天自駕遊。無咩特別期望，只想放假可以自由自在去遠啲！

行程：蓮花口岸-番禺百萬葵園-廣州宜家傢俬-住宿南沙資訊科技園-南沙天后宮-灣仔買燒鵝-蓮花口岸。

番禺百萬葵園

估唔到仲有啲櫻花喎!

應該係年紀唔細既小型豬, 百萬葵園內

南沙天后宮

本命年(2)

關於我既本命年，又講我啲黑仔嘢吖！

葡國護照過期半年喇。影好証件相，凖備好葡國身份証同澳門居民身份証副本，都知要睇葡國領事館面色架喇，記住要忍、忍、忍！做好曬心理凖備喇，咁上個星期二咪去換証囉。不出所料，首先門口櫃枱既两個女職員好鬼刻人憎呀！
"換葡國護照。"
"有冇白咭？"
"咩係白咭呀？"
"金咭識唔識吖，冇金咭點睇醫生呀！"跟住個女人查咗電腦，就話"你已經有白咭架喇！"
"証件副本咁皺，唔收呀！"
"落雨，擺咗落手袋，哎！"我心諗只係影印本既角位皺咗，又唔係皺到著菜咁。佢地啲態度真係好惡劣呀！！
佢肯收我啲嘢，好似係我好彩咁！忍、忍、忍、忍、忍，就體諒佢地心理不平衡喇！好囉好囉，過咗喱两個女人既關咯。

影相、打手指模都無咩問題，不過電腦簽名就用咗差不多半小時。可能係我既簽名特別咗啲，電腦既反應跟唔到，要我慢慢扮簽名，仲要我練習簽名好多次，然後電腦出嚟既效果先有少少似我既真簽名！我又幾好耐性咁喎！

好囉好囉，俾錢囉，應該搞掂喇啩，點知狼狽嘢係最後。估唔到護照續期加補發白咭要九佰零七元，唔够錢咁咪去櫃員機噤錢囉！仲估唔到既係張咭三月份到期，嗰日係四月一日，而張新咭係屋企，真係愚人節呀！！只好揾附近番工既朋友求救借咗九佰元。塞車、等車位、搞護照足足用咗我两個半小時！！

跟住上星期四莫名奇妙咁係停車場唔見咗張收費咭，被罰咗二佰二十元正。今日(4月9日)又突然收到初級法院電話，去年10月9日係氹仔北安超速，要交罰款八佰九十五元正，唔交罰款就要開庭，真係好黑呀呀......！！有啲好彩既係有朋友係初級法院做，佢話會帮我跟進同交罸款，咁唔駛搞到我咁忙碌。

其實係咪我輪盡呢？唔理喇，入埋本命年條數囉！！哈、哈、哈、哈、哈！！

木棉盛開呀！

最近天氣陰陰濕濕，不過木棉花就開得好靚。鮮紅色既花，挺拔既樹幹，好醒神呀！木棉樹好高，好難影，無咩陽光，啲相就麻麻地喇。

無聊自駕遊

隨處可見既碉樓，唔駛入場費。













路邊食燒鵝 。













开平隨處可見既菜地。

好似好認真咁睇地圖。

上星期既復活節好低調咁同四個朋友去咗中國大陸兩天自駕車遊，梗係唔係我揸車啦！無咩凖備架，無預先編排既行程，最後係：蓮花口岸-开平-南沙-順德-石岐-拱北口岸。

中午十二點多係蓮花口岸出發喇！向西行，無塞車空氣好，行車約两個鐘頭就到开平囉！开平最出名既係金山亞伯衣錦還鄉建既碉樓，中西式混合既碉樓係有防盜作有既！由於我地慢慢咁嘆午餐，去到赤坎碉樓區差唔多五點啦！啲咩馬降龍碉樓群、立園，五點半就閂門咯喎。無買票係咁易望吓D碉樓，就去咗買开平靚燒鵝。六點幾係馬路邊好滋味咁食燒鵝喇、飲啤酒喇。跟住就趕路去廣州效區南沙大酒店。

其實唔係好識路，沿途問吓人，不過都Miss咗個街口而行咗條遠路，終於差唔多到南沙喇！仲體驗到咩叫做中國大城市繁忙既交通！嗰日唔係中國大陸公眾假期，係廣州效區既寛濶馬路上，架車好似無移動過咁塞咗四十五分鐘，而周圍係密質質巨大既貨櫃車，好有壓迫感呀！！晚上十點半終於可以係南沙大酒店Check In啦！大約十一點半仲係酒店附近食咗個台式火煱喱。

瞓咗差不多七個鐘頭，起身喇。望吓個花園，好正喎！真係超大既花園呀！好多整齊而茂盛既樹木，好正既園林設計；幾個露天既超大游泳池同按摩池；仲有高爾夫球場；其他室內設施唔駛講啦。不過落雨無出去行吓。酒店既裝修豪華得嚟簡約而唔俗氣，嗰啲鮮花植物擺設真係好淸雅，好細心既設計。聽講係霍英東建既酒店，睇嚟呢個己故既有錢佬都有啲品味喎！我地團友既呀媽有人事關係有六折，間房伍佰幾蚊晚啫！

係酒店食咗個早午餐。好鮮味既清蒸野生鱭魚，啲鼓油汁調得好好味呀！啲普洱茶都幾好飲。天氣咁差有咩做呀？揸車咯！去順德啦！又塞咗約三十分鐘車，不過就無咁多貨櫃車，因爲係周未。四點幾係順德食咗個中式西餐，之後見識咗順德傢俬城。嘩！好多好多傢俬舖，睇唔掂呀！

喂，今晚係邊度過夜呀？去石岐食晚飯先講吖。九點幾食飯，啲燒乳鴿麻麻地，炒腸粉就唔錯，見到差唔多台台都叫一碟。食飯既時候知道馬英九當選，好關心台灣新聞既團友就放下心頭大石。都係番屋企瞓覺咯！十一點三十分過拱北關，玩完咯！！

好似無做過啲咩咁！無認真咁睇吓啲旅遊景點、又無認真咁嘆吓間舒服酒店、又無買啲咩嘢，只係坐車、食嘢、吹水、瞓覺，哈哈哈。咁又過咗個好隨意、自由自在、好輕松既两天假期喇！！

本命年(1)

我既傑作，有血有汗蘿蔔糕。

今年鼠年係我既本命年，有啲嘢係咪可以唔信呢？鼠年過咗一個月啫，係我身上就發生咗两件小小既不幸事件。

六天前唔見咗個電話，不過又有啲開心咁有個新電話用，有啲麻煩係要慢慢咁入翻啲電話號碼。超鐘意食蘿蔔糕，買嗰啲通常唔好食，於是今日就自己整蘿蔔糕，點知切腊腸時切親隻手指。不過整得幾好食，只係濃味咗啲，落多咗糖同鹽。好喇，要整多次，整得啱口味啲。

今次係我第一次唔見電話。我係輪盡，揸刀容易切親自己，不過好耐無整親囉喎，係咪有啲黑仔呢？鼠年仲有十一個月，睇吓點啦。

鼠年之始

好凍呀！豬尾鼠頭凍咗差唔多一個月喇！真係咩都唔想做呀！咩都唔想諗呀！好想冬眠囉！！！唔駛番工！唔駛食嘢！剩係瞓瞓瞓！！！醒番就係温暖充滿生氣既春天，咁就好囉！！！

今日年初十喇。之前既農歷新年假期我都係瞓瞓瞓，起身就食嘢，都好似冬眠咁架喇！不過做咗少少嘢，就係開始認真咁學倉頡輸八法。真係唔容易呀，要好有耐性咁記住啲字母、字型、取碼、拆碼！Ah......！勁辛苦呀！！！最難掌握係拆碼，嚡！！！要堅持呀！總之要練習、練習、練習，點都要學識為止！

好，學識中文打字就係鼠年其中一個望啦！要好似老鼠咁精靈呀！要死記咁多嘢，手指又要緊跟大腦指揮靈活咁活動，睇嚟中文打字可以預防老人痴呆症同中風嗰喎！唔好用咁多手寫版喇！！

我的高原體驗

為準備二月尾馬來西亞神山之旅，最近两個周末都在路環行山。今日天寒地凍，上午游完水，午飯後與幾個朋友在路環行了約三個小時，行了不少梯級。嘩，好健康既周末！

其實行山真係我既弱項。以前在尼泊爾行過少於三千五百米高既山峰，同一組人行得最慢既係我，經常要停下透大氣，比我年紀大十八歲既女同伴都行得快過我，我只係想盡力走完全程，真係無能力鬥快呀！参與對自己有挑戰性既體力活動係可以訓練意志力和耐力嗰喎！

又講番去年既西藏之旅吖。根據以往經驗我知我係好容易得高原反應嘅，所以去西藏之前做足準備功夫。看有關高原反應既資料啦，準備冶療高山症既中成藥同西藥啦。只係靠意志力唔够嗰喎，處理唔好既高山反應會死人架！好，出發前两天就開始服預防高原反應既中成藥高原安。我哋由青海省西寧開始西藏之旅，西寧約二千七百米高。為了慢慢適應高原氣候，我們在青海遊玩了三天，經過和短暫停留過四千二百米高既地方，感覺都好正常喎。根據用藥指示，預防高原反應可以服高原安五天，於是服藥五天就停藥。停藥既两天在青藏火車上都無咩事。晚上11時到達拉薩火車站都感覺良好。拉薩約三千六百米高，係拉薩第二天下午開始覺得唔妥啦，感覺面部腫脹，傍晚後要透大氣及行走時有少許頭痛，好唔舒服既感覺。高原反應果然係到達六小時之後才出現。當晚睡前食咗半粒治療高原反應既西藥Acetazolamide，不過整晚都仍然睡不好，真係有啲担心如何繼續旅程呢？之後的早上就决定繼續一天三次服食中成藥高原安。嘩，高原安真係有用架！食番就無事咯，行布達拉宮咁多級樓梯都唔喘氣喎！

出發去四千七百米高既納木錯啦！個湖區真係人間仙境咁，下午到達時好舒服咁係湖邊散步同影相。晚飯後就死啦，夜晚好凍有零度，去完露天廁所吹咗風，忍受住頭痛躺在類似鐵皮屋既旅店。外面下着雨，呼呼既風聲，越來越辛苦好似發緊高燒既感覺。隔離床既同伴就突然嘔吐，嗌住要氧氣呀！導遊就入嚟俾咗幾支氧氣佢吸。半夜起身食西药啦，冒雨去露天廁所啦，真係超辛苦既晚上，心諗做咩事俾咁多錢又要受呢啲咁既苦呀！早上起床後個人偶偶地，對住啲早餐都食唔落。全組人都有不同程度既高原反應，只好提早離開納木錯，走向較低海拔。跟住我就一路坐係車入面瞓呀瞓呀，啲同伴話做咩我可以瞓得咁冧架！恢復得好快喎，中午就好開胃咁食咗個午飯。唔食西药喇，高原安就繼續食。

到咗今次旅程最具挑戰勝既高度啦，五千二百米高既珠峰大本營！總結經驗醒目啦，除咗繼續服食高原安外，出發既早上就開始加服西药每天三次每次一粒。下午約四時到達珠峰腳既賓館都感覺良好。晚飯時死啦，無胃口！頻密想去廁所大解决，去完廁所就頭痛半小時，個人又好似大病咁。幸好夜晚就瞓得唔錯，又無去廁所，隔離床既同伴都無事。第二天早上就坐車去珠峰大本營，再由營地坐馬車去近距離欣賞珠峰。應該有零下幾度，坐住馬車唔郁真係好凍呀！如果步行應該無咁凍，不過就可能會有高山反應。沿途見到啲鬼佬充滿氣力咁踩單車，好勁呀........！！！終於近距離咁望住世界之顛-珠穆朗瑪峰，真係滿足曬啲虛榮感呀！

總結西藏之旅既經驗，要停留係三千五百米高既地方，我就要連續服食高原安。去四千五百米高以上既高原，我就要提早两天加服西藥。有最近認識既朋友告訴我，佢都係去年去咗西藏，只係靠意志力對抗高原反應，佢辛苦到想死，回來後記憶力减退三個月。真係好險呀，唔可以輕視高山反應！

好啦，今次行神山就好好運用西藏之旅既經驗。神山係東南亞第一高峰約四千米高，比起納木錯和珠峰營地神山海拔較低，不過今次係神山攻頂之旅會有較大既運動量，睇嚟都係一次辛苦既旅程！仍然有挑戰自己既滿足感！

再見2007

注意：啲相唔係我既傑作。

Bohol島上的眼鏡猴，身長只有4吋半，尾巴有10吋。

很快地2007年成為歷史三個星期啦！每逢大時大節都特別想去旅行，可能想離開澳門啩！因此去年聖誕節很隨意地與幾個朋友去了菲律賓Bohol島五天遊。以很輕鬆的心情向2007年說再見。

短短的五天團由12月20日至12月24日，有潛水及陸上遊，其中包括來回香港-宿霧及宿霧-Bohol島两小時船程既交通時間。行程唔係好緊迫喎，有6次下潛、一天環島遊、約2小時既宿霧Shopping。今次係我第一次潛水旅程有小朋友同行，一個2歲多愛吃而唔多扭計既可愛小妹妹、一個9歲多乖巧而靚仔既小男孩，幾好喎，感染吓啲小朋友既稚氣。

今次潛水啲水好清呀！水好平靜，有充滿色彩既珊瑚同魚，無大野睇，不過就好似係水族箱潛水咁，好Relax呀！一個Dive Master只係帶我地四個潛水員，細Group既潛水好輕鬆舒服喎！仲有一上水面個DM就幫我地除蛙鞋同BC，真係五星級享受呀！

好啦，玩完咗2007年！好似無習慣話有咩新年望喎，只希望2008年可以平靜充實咁渡過。繼續堅持還未完成既進修課程啦；去年買咗部Nikon D80，執番影相既興趣啦；潛咗水咁多年，唔好剩係係水底胡思亂想咯，今年會認真學影水底相啦，放棄一啲係水底自由自在既享受囉；仲有繼努力工作呀；亦希望今次旅程認識既新朋友可以順利達成佢正在努力堅持既人生夢想，而佢既仔仔身心健康咁成長啦。