睇鯨鯊呀！

今年四月初去了菲律賓Donsol潛水。Donsol係著名既鯨鯊之都，而二月至五月鯨鯊就會係Donsol聚會架啦。

鯨鯊係全世界最大既魚，今次可以如此近距離興鯨鯊會面，差唔多可以輕撫牠，好開心呀！睇鯨鯊只係需要浮潛，唔駛潛水架，不過追鯨鯊幾消耗體力架。

每次出海睇鯨鯊大約需两小時。好，出船啦！着好蛙鞋、戴好潛鏡、咬住 Snorkel、坐穩船邊，準備好啦！仲有聚精會神、豎起耳仔，等船夫尋找鯨鯊蹤影。當船夫話"JUMP!"，就立即跳落水，追住個黑色物體，追到啦！就輕鬆咁陪住條鯨鯊遊水。有時伴住條鯨鯊游十幾二十分鐘佢都唔捨得走呀！有時一落水，就近距離咁见到個龐然大口，好似想 Kiss 你咁，好震憾呀！两小時以內跳水、游水、上水，都至少有十次架，都幾辛苦呀！有D團友話，下次嚟睇鯨鯊要領隊準備每人一壺朱古力奶，補充體力呀。今次只係出咗两次船睇鯨鯊 Ja，唔夠呀！

今次都幾特別係睇螢火蟲。其實我咁大個人好似未见過螢火蟲呀！今次十幾個人迫係隻爛鬼船到，又搞到周身泥，黑麻麻咁欣賞整棵樹密質質既螢火蟲，不過都覺得有D浪漫呀！

甜蜜的回報

朋友早幾天生日，剛出身既大仔請她及其他親人食飯，仲靜鷄鷄咁放咗份名牌香水生日禮物係佢床頭。佢好冧呀！好感動呀！個仔終於大個啦！

我好佩服呢個朋友架！佢好多年前放棄咗份穩定既政府工，投身於自己有興趣及富挑戰性既行業，幾勇呀！跟住多年來獨力咁養大两個仔 ，一直無怨無悔堅強咁生活。努力地做盡責既單身母親、盡心於事業、公餘亦發展有興趣既嗜好，我真係覺得佢好努力咁生活呀！依家個仔開始有回報啦！真係替佢開心呀！係呢D咁堅強既朋友身上可以獲得能量架！

其實每個人都有自己既故事，無論如何都要努力地生活呀！

遙遠的祝福

遠方的朋友下午來電，緊張的說了幾句話。告知病情有變，两天之後要接受化療。我不知如何回應，期望他好運及好好保重。

好幾個朋友的個案令我相信，除了要積極治療，最重要的是對將來還要抱有期望，要有戰勝癌魔的信心，這樣病情的控制會好很多。心理質素高很重要呀！亦希望他身邊的人能給予他足够的支持。將來我們一定可以在澳門開心的见面呀！我們在澳門等你呀！

Redang既相片

呢個潛 水人係我呀！

睇幾張 Redang 之旅既相片吖。

Redang 之旅

五月尾去了 Redang Island，又叫熱浪島。哥度好多人呀！人山人海咁。不過我好輕鬆呀，無帶相機。只係享受水面水底陸上既自由自在，D相係其他潛友架。估唔估到係相入面邊隻脚係我既。

仲輕鬆D既係，隻潛水錶無電又換唔到電池，可能由於上次換電池時安錯咗電池蓋，今次幾個大隻佬九牛二虎之力都搞唔掂。咁仲好，係水底想知潛幾深就睇吓Buddy隻錶，三分鐘停留就跟住人；不過最重要既野我知，我知自己仲有幾多氣，生命尤關呀。唔影相亦唔知自己潛幾深，係水底只係享受另一個世界、傻吓傻吓咁、或者胡思亂想。真係好Relax呀！

繼續桂林之旅

再講番桂林之旅吖。其實桂林市內既著名景點唔駛去架啦。漓江既一日遊船河都可以 Skip 咗佢，又貴又商業化，隻船又多人，一D都唔悠閒。下次揀D係左近、話去就去、又靚又自然既地方渡假，去陽朔同龍脊梯田就得架啦。

今次只係坐住 Local Tour 既旅遊車遊陽朔，不過坐係架車裡面望出去都感覺到陽朔係一個好悠閒既地方。除咗D旅遊商業區，随處都係連綿不絕既小山呀、水呀、樹木呀，真係好似遠離世俗咁。唔怪得好多鬼佬唔走留係陽朔落地生根啦。係度住番幾日，尤其踩吓單車，好正呀！不過着住單車衫同單車褲，又帶埋個頭盔係陽朔踩單車又好似唔係幾襯度喎。

中國好多山都好靚，不過龍脊梯田靚得好特別。如果係山上住番D木屋幾日，日日望住D狹窄優美梯田，聞住D清新空氣，食住D農家味道既竹筒糯米飯、香芋炆筍、新鮮青菜、桂林米粉，仲有可以悠閒咁行吓山，嘩！個人都清新咗呀！真係要揾次試吓呀！

星期六的午餐

今日上午游完水後心血來潮去買了新鮮牛柳、西生菜、麵包，然後返屋企好快咁搞咗個午餐比自己食。葡式沙律、煎牛柳、麵包、芝士、紅酒就成為我今日既午餐啦。其實係我第一次煎牛柳，唔知係块牛柳靚呀，定係我煎得好，块牛柳幾好食喎，不過块牛柳唔貴架。煎到有D生而無血水，而块牛柳仍然軟熟有牛味，正！不過一開始煎块牛柳時，幾危險呀，D火升到去抽油煙機咁高，嚇親呀！食完個午餐仲煲咗杯咖啡比自己飲，好似好嘆咁。睇來明天要再來一客牛柳。

有時一個人食野我仲會食好D，唔好刻薄自己。好似我會揀間舒服嘅餐廳，要服務好，有啱我口味而好嘅食物，然後坐低慢慢嘆。其實做得好辛苦之後，可以一個人靜靜地嘆番餐好嘅，唔駛揾野同人講，幾Relax架。而且一個人食野鍾意食セ就食乜，唔駛就人！其實我係咪有D自閉慨呢？

我的病人 - 激死我喇

今日番工幾憎呀。好似有個唔够五十歲來覆診既病人，唔記得抽血又唔記得照X光片，不過記得番來覆診喎。唉！頭先七十九歲個係咁，呢個四十幾歲既又係咁，浪費大家既時間，又浪費驗血既Quota，激死我啦！好肉緊咁鬧咗佢幾句，不過個病人唔嬲喎，仲話會用辦法記住D日子，下次唔會啦。唔得啦，收吓D火先，勞氣會傷身架！

越電腦化D醫生就越多濕碎野做。好似一個七十九歲廣東話又唔係幾好既病人，要解釋俾佢聽要去山頂照片，點樣嚟抽血，你話幾花時間呢！而出邊又有成堆病人等緊，好緊張呀！我一緊張就容易鬧人架啦，都係未够功力。

閒聊人生

昨晚將個Blog嘅website散出去，今日D朋友有反應，幾開心呀！

今日下午幾個同事發咗嗡風一陣。一個話有两個仔應該生多個女；一個話見到老豆年老多病，依加有地幾個女照顧，咁地幾姊妹無咁辛苦，而自己得一個仔，應該生多個，咁老咗有多D仔女照顧自己。係呀係呀，最近呢十年我都係咁認為呀。最好有個溫暖嘅屋企，有兩個仔两個女。不過人生唔可以翻轉頭，亦唔可以再來一次。我唸只可以係目前所擁有嘅狀况中令自己活得開心或者精彩。

對於我來講，首先做一D嘢令自己有較好嘅健康。咁我會做瑜珈啦，游水啦，盡量健康D嘅飲食啦。仲有維持一班好朋友啦，咁老咗就可以互相照顧。最好係我可以照顧人而唔駛人照顧，施比受更幸福呀。仲有要有D錢同可實現嘅夢想。

有朋友話昨日参加铁人比賽成績好過之前次，好開心呀！我都Tang 開心呀！欣賞D人唔會因為係一定年紀就話唔做呢D嘢唔做D嘢。最重要唔係囉驕人嘅成續，保持心境青春，努力呀！

我嘅桂林之旅末寫完架。係桂林陣時好似無咩感覺，依家想想吓仲有嘢寫喎，不過好夜啦，遲D先寫吖，仲會寫以前D其他旅程。

桂林之旅

繼續講桂林之旅啦。其實對桂林之旅無特別期望，只因為有两天連着周末的假期，就揀一處又近又方便出發又未去過嘅地方，隨便地就去了桂林。第一次係珠海機場搭飛機呀。

桂林市無咩特別，但桂林人給我較好嘅印象。雖然桂林係一個很早開發嘅旅遊城市，但當地人看來仍較純樸。好似Ｄ的士司機咁吖，幾老實呀，無濫收車資。大部份當地人都做旅遊業，例如兩公婆都做的士司機，而個女就做導遊，聽口氣又嘅滿足現狀喎。

其他旅遊業現象就全世界差唔多。跟咗两個一日來回嘅 Local Tour，都係帶買嘢。漓江遊嘅嗰團，一開始上船前就帶你去買所謂貓眼石，係呢間店停咗一 個半鍾呀！D內地團友都唔耐煩，不過又無曹喎。我六點幾就起身啦，咁無聊企係度等咗咁耐，幾火滾呀，仲有導遊同司機都好似故意失踪咁。一見到個導遊出現，我就鬧咗两句。不過跟咗两個Local Tour，整體來講，D導遊都係負責任嘅，其中一個男導遊仲好有愛心添。

見到D靚妹內地遊客，又開咗眼界啦。地两個一組自由行，一身打扮好似日本妹韓國妹咁，好 In 呀。地都幾豪架，旅遊點D攝影師同地影人像相，幾十蚊張架！嘩，影咗厚厚一本。呢D就係內地有錢一族嘅下一代啦。應診去多D大陸自由行，體驗一下祖國嘅現况。

寫着呢嗰Blog睇着臺灣版嘅白色巨搭，首主題曲幾好聽 (劇集開頭首) ，幾鍾意D歌詞。