我的病人 - 失戀呀

前两天一個25嵗女病人來覆診跟進化驗結果同有關既健康問題。

我睇緊其他病人既時候，佢就推開診室門問我："我唔知咁樣掛咗號未呀？見到顯示屏我既號數係黃色。"我就話："你已經攞咗掛號紙仔，電腦又顯示你 Check In 咗囉喎，你等陣喇。"佢好似好緊張咁担心睇唔到醫生喎！

好喇，到佢啦。解釋咗化驗結果同有關既健康問題，又約咗下次覆診，佢仲未想走喎！

然後佢認唔住咁同我講："我同男朋友分咗手喇。"又講咗令人難以接受既男朋友分手理由。
"你係咪好唔開心呀？"
"失眠咗一晚囉。我做翻運動身型結實咗。啱啱係貴州探完亞婆，貴州啲天氣好好呀。"佢又問咗一啲其他既健康問題，又話要扮靚啲。
"你咁靚女，下次覆診既時候，你可能已經有咗新男朋友喇！"
唔係擦鞋喎，佢真係好靚女、夠高、有標準身材嗰喎！
"我好鍾意佢架，佢對我好好，個人又好，我亞媽都好鍾意佢呀。佢個樣同身型又好，我好鍾意呀！"
真得幾可愛喔，有青春真係好喇！

之前既門診佢已經講過有關佢同男朋友既問題，今次佢就講個答案俾我知。作爲全科醫生面對如此個案，我要避免給予主觀既建議。只需要適當回應，聆聽、給予支持、得到病人既信任己經足夠啦。

其實嗰日我由上午九點睇門診睇到約十二點半，然後用二十分鐘食咗個午餐。之後就開始睇中午既七個體檢者和覆診病人，佢係七個之中既一個，而我要係两點半鐘交個診室俾其他醫生做下午既門診。當我睇到呢個病人既時候，都有啲累同精神緊張。不過當佢纒住我同我講佢既心事既時候，我嗰啲咩壓力呀、咩緊張呀，好似驅散咗咁。

我睇呢個病人用咗約三十分鐘呀，不過佢既信任俾咗我满足感而減壓囉。睇嚟病人既信任俾咗我唔少既工作動力喎！