延續放假心情

西藏回來差不多一個星期啦。這二十天旅程要對抗高原反應及有時要忍受寒冷天氣，辛苦架！不過心情好 Relax 呀！當旅程完畢踏足澳門時，心情就開始有啲沉重啦，真係咩都唔想做呀！行李未執好，衫未洗曬，啲相未整理過呀！真係唔捨得旅行時既無壓力無重狀態呀！

好啦，唔想理就唔理住。昨天傍晚放工一個人包池咁游咗一個小時水，個救生員可能有啲寂寞咁撩我講嘢，我唔鬼睬佢，只係不停咁游。之後翻屋企睇咗部電影"Gloomy Sunday"，睇陶傑既散文知道呢部電影，佢讚過女主角靚到暈。這部電影把布達佩斯拍得非常古典浪漫。東歐我去過捷克、匈牙利、和波蘭，我都覺得這幾個國家充滿着古樸既建築和浪漫既氣氛，我還想去其他東歐國家呀。這部電影既音樂和歌曲好優美，女主角美得優雅而非常誘惑，不過三個男主角外表就平凡咗啲。故事講两男一女順其自然既和諧感情關係，講猶太人悲哀既命運同佢地堅持既尊嚴，而女主角却為救两個心愛既男人而放下自己既尊嚴，不過都帮唔到佢地。故事亦講卑鄙既納粹德軍，這個卑鄙既男人於八十歲生日時重遊布達佩斯，最後死於女主角既佈局中。部電影想講好多嘢呀！唔想駁古，只想享受投入於電影中两小時既 Relax。

好喇，有啲嘢真係要做架啦！要執翻好啲行李，執拾幾亂既屋，整理千幾張既相，修剪平台既草和竹樹.......等等，記住要換葡國護照呀！仲有要睇正經既書啦！十一、十二月既星期六有好多課要上呀！