充實的周末

昨天星期六参加了六小時關於精神疾患既課程，聽完後感覺很好。好喇，憑記憶摘錄一些精神科醫生既演講內容同我既感受吖。

真係好享受昨天上午精神科醫生所講既內容。按照編排佢要講關於焦慮症，不過一開始佢就話講Powerpoint 既內容好悶架，首先講佢想講既嘢。佢用水筆係白板劃一個大圈代表正常人群，一個細圈代表精神科醫生處理既病人，處於两個圈重叠而被塗黑既小部分人係唔會見精神科醫生，而佢哋才是最危險同最值得關顧既人群。這部分人全部屬於全科醫生既病人，有些經全科醫生及時處理可回復正常，有些病人經全科醫生及時轉介至精神科可得到早期冶療。無人無煩惱架，唔可以同朋友、親人講，咁佢哋首先會揾既醫生係全科醫生。佢帶住感慨咁講，在精神科醫生手上既病人差唔多全部都唔可以回復正常架喇。精神科閂咗好似對社會無咩影响，衛生中心就唔得啦。

我地全科醫生担當守門員角色，做住預防和早期診治疾病.....等等唔可以很快顯效既工作，很難得其他科既專家講呢一番我哋全科醫生係如此重要既說話，對我哋真係好有鼓舞作用呀！

佢講咗一啲醫生對待病人應有既態度。佢話要抱住醫生與病人都同樣係人既平等心態對待病人，體諒一些惡劣態度既病人，咁我哋會有良好既醫患關係。

佢又分享咗一些佢臨床所見既真實個案。好似天才與精神病有着密切關係既個案啦。我慶幸我係普通人呀！又好似童年期被親人虐待而嚴重影响心理成長既個案啦.....等等。另外佢又話每個人都係自戀架，睇吓係咩既程度啫。

最後他才進入原本要講既主題。佢話啲咩美國既、國際性既焦慮症診斷標準，都係為咗要發表論文時才會完全用到。臨床工作中診斷焦慮症最主要都係根據病人主觀感覺同醫生既主觀判斷。

呢個精神科醫生可能沒有傳統地、詳細地講述如何診治焦慮症，不過佢帶俾我哋既係具啟發性既訊息。有啲可惜既係由於佢講得較快而帶北京口音既普通話，有時我哋聽唔明。希望澳門留得住呢啲咁有 Heart 既輸入專才啦。

下午既精神科醫生則較系統和簡明地講述憂郁症既分類和診治。佢話精神病係靠觀察病人和傾談手段來診斷，因此予病人温暖感覺為開始既溝通技巧很重要。佢同樣強調精神病診斷都主要係靠醫生既主覲判斷；佢話根據估計精神病在未來將會係第ニ位既死亡原因。佢鼓勵我哋全科醫生可以大胆應用治療憂郁症既藥物，推薦咗一些較安全和容易掌握既藥物。佢講既內容好實際，都好有收獲呀。

而今天星期日上午游完水後，食咗早餐，就去街市買咗一些鷄、米粉......等等。中午用西藏買回來既松茸菌、鷄、加少許火腿和干冬菇，泡制咗有自我味道既松茸菌鷄湯米粉，好好味呀！我諗我真係有啲入厨天份架！今日又睇咗一些與現正修讀課程有關既書，今晚要参加一位同事既婚宴，又寫咗呢個咁長既 Blog。真係過咗一個好充實和無雜念既周末，希望咁平靜既思緒可以繼續下去啦！