泳池小爭執

本來今天放工後不太想去游水，不過諗吓最近肥咗，而天氣轉泠泳池無咁多人啩，泊好部車掙扎咗一陣，就狠下决心入去泳池游水。

入到去泳池見到都唔係好少人喎，泳池小小有十幾個人呀！觀察咗一陣，揀咗條只有兩個人正在游水既泳道就開始係咁游囉，有時會被人阻住而要停一停避一避或者轉小小方向才可繼續游。點知突然撞到個亦係不停咁游既女人，撞到我好痛呀！心諗佢有無搞錯呀，唔睇人架！不過自己都無睇到佢喎，唔理啦，帶住痛繼續游囉。游游吓唔知點解自己停低咗，就见到泳池邊有個嬲樣既女人等住咁對我講：“你亂咁游架，大家都要靠左游家嘛！我被你撞到泳鏡跌咗，差啲浸親呀！”咁我話：“對唔住喎，我唔係故意撞你架。我係靠左游架，頭先要避人先至游歪咗撞親你啫，對唔住囉。你知唔知你都撞到我好痛呀！”佢又話：“你爬頭之嘛！”咁我又話：“爬咩頭吖，人人都係咁樣游架啦！”我心諗我只係以游水嚟鍛練身體，泳速快極有限既泳術，又點會係想爬頭呢！咁唔通前面既人蟻欄咁慢，我都要跟住佢囉喎。有啲被人誤解既感覺。話時話吖，呢個泳池無指示牌話要人靠左游個喎！真係想講多句：唔游喇！俾曬你游囉！不過真係唔想係公眾場合為啲咁少既事同人鬧交呀。只好擰擰頭，帶住不快既心情提早離開泳池。睇嚟就算係冬天都要八點之後，泳客再少啲既時間才嚟泳池游水咯。

泳池內互相撞親吓係經常發生既小事，點都無諗到會被人追住嚟教訓，好似剩係我錯咁！怪都只係怪我地两個都游得太認真太投入囉！其實呢個係公眾游池內難以避免亦難以分辯誰對誰錯既小意外，只要互相包容一下，講聲對唔住，然後檢討一下，睇吓以後大家可唔可以小心啲，咁件事咪過咗去囉。

我覺得人很多時都係自以為是架，好似年紀越大越係咁添。我地會以自己既想法猜度別人，唔清楚件事既來龍去脉，亦唔清楚別人既諗法，然後就發表誰對誰錯既意见，咁唔真實既故事就傳開去啦。希望自己唔係一個咁自以為是既人啦。